Khamis, 12 Januari 2012

Novel Cinta Brunei


Rahsia (part 2) 

(Back to back-hari pembebasan)
Keluar saja si Adam dari penjara kana aga oleh adinya si Irfan, ia pun tarus balik ke rumahnya bejumpa mama sama bapanya. Sampai saja dirumah, si Adam tarus membagi salam. Dua kali membagi salam barutah kedangaran suara mamanya menjawap dan membukai pintu.Si Adam tarus mengaga mamanya,mencium tangannya dan tarus duduk memaluk kaki mamanya sambil menangis dan meminta ampun.
Macamanapun jua, syurga bagi seorang anak adalah dibawah telapak kaki ibu. Keredhaan Allah pada seorang anak terletak pada keredhaan ibunya. Iatah kitani seboleh-bolehnya jangan sekali-kali melukakan hati mama kitani. Setitis aingmatanya gugur kebumi disebabkan terhiris oleh perbuatan kitani,dosanya memang basar. Bersyukur tah kalau kitani lakat lagi ada indung.Macamana dengan orang yang inda lagi ada indung? Atau inda pernah kenal indungnya dari damit. Jadi kalau kitani masih punya indung, hargai dan jaga durang selagi durang masih ada. Jangan nanti kitani menyasal bila durang sudah inda ada lagi di dunia ani. Inda ada sama dua tiganya tu. Apapun ku sayang indungku.
Bebalik arah cerita ani, meliat saja si Adam memaluk kakinya atu, mamanya ani pun menangis jua sambil mengusap rambut si Adam ani.Gerenti Mama si Adam ani menangis gembira pasal si Adam sudah kana bebaskan. Meliat babak menyedihkan atu, si Irfan yang dari tadi bediri di pintu pun mengalirkan aingmata jua. Suasananya jadi sayu. Alum lama lapas atu, kedangaran bunyi melagur dalam bilik tidur mamanya ani.
Otomatik si Adam pun melapaskan pegangannya arah kaki mamanya ani dan tarus belusir menuju ke bilik mamanya. Macamatu jua dengan si Irfan dan mamanya. Sampai saja dibilik atu, si Adam meliat yang bapanya gugur dari katil.
"Kenapa kita Pa?"
Si Adam ani pun tarus mengaga bapanya dan mengangkat semula naik ke katil. Bapa si Adam pun besuara,
"Syukur tah kau kana bebaskan udah Dam. Bapa ani tadi kan naik ke kerusi roda atu tapi inda bapa tebala."
Rawan hati si Adam mendangar.Tarus di ambilnya tangan bapanya ani dan diciumnya.
"Minta ampun minta maaf ku rah kita. Semua ani salahku Pa. Kalau bukan pasal aku, inda kita macamani.." kata si Adam ani pelahan sambil menangis.
"Jangantah lagi dikanang tu Dam.. Bukannya salahmu tu.Memang sudah nasibku kana takdirkan macamani. Atu sebagai penyebab saja tu.."
Si Adam diam ganya dan kemudian merenung jauh. Tekanang ia peristiwa 7tahun lapas atu.
(7 tahun lapas- sehari selapas bapa si Adam eksiden)
Pagi-pagi lagi sebelum buka kadai, si Adam sudah pacak-pacak dapan woksyop si Ah Seng pasal ia tau si Ah Seng tinggal dirumah atas woksyopnya atu. Dimalamnya sudah si Adam menerima telipun dari woksyop tempat nya menghantar kerita lapas eksiden atu membagitau yang kabel brek kerita si Adam atu macam bakas kana karat.Iatah tau tia si Adam yang keritanya atu kana sabotaj. Sebab atu tah pagi-pagi lagi si Adam tarus ke woksyop si Ah Seng ani.
Buka saja kadai, tekajut si Ah Seng meliat si Adam ani.
"Aduh.. Hantap jua awal kau kemaie ani Dam.. Apa kian hal nya? Ada kan kau kuwapak akan?"si Ah Seng tarus betanya si Adam dengan cakap kedayannya atu.
"Seng atu ada kan ku tanya kau.."
"Owh bah tanya tah saja.."
"Atu wah Seng, sapa ngusai kerita ku hari tu ah.."
Si Ah Seng diam sekajap dan mengingat-ingat.
"Perasaanku, si Ah Meng bah yang mengusai matuka mu tu.. Napa kian Dam, rusak bebalik kah?"
"Nda pulang rusak Seng tapi mun kau kan tahu kemarin keritaku eksiden melanggar kayu pasal nada bebrek.Sudah durang cek dimalam rupanya bakas kana karat wah.."
"Atu bana,bukannya habar tu.."
"Iatah Seng kan ku tanyakan si Ah Meng ani.Ani mana ia?Tarus tarang ku rah mu ni Seng ah, mun banar ia yang sabotaj brek ku atu, ku kerajakan banar ia sampai separuh nyawa,baru ku laporkan rah polis."
"Atu Dam.. Si Ah Meng mulih kampung kemarin patang ah.. Alasannya mamanya sakit.. Ku liat gagas lagi usulnya atu.. Awu Dam, mun bana ia yang sabotaj matuka mu tu, aku pebaik sendiri yang memijar kedia.."
"Bila ia balik kemari? Banar ni ia balik kampung? Jangan kau kan berpakat sama ia Seng walaupun kedia atu sepupumu.Mun kedapatan dua-dua kamu sakit olehku.. Ingat kau tu Seng.."
Si Ah Seng mengangguk ganya.Lapas atu si Adam pun jalan dari sana. Nda si Ah Seng teliat si Adam memakai apa.Sudah si Ah Seng yakin si Adam sudah nada baru tah si Ah Seng melagau si Ah Meng yang betapuk didalam. Si Ah Seng tarus becakap bahasa cina arah si Ah Meng. Rupanya si Ah Seng ani memarahi si Ah Meng pasal kerita si Adam atu tapi si Ah Meng tarus mengunjuk duit seribu arah si Ah Seng.Apalagi tarus nda banyak bunyi si Ah Seng ani. Lapas atu si Ah Seng pun menyuruh si Ah Meng untuk balik kampung dulu betapuk. Lagipun tadi sebanarnya si Ah Meng tekajut pasal meliat si Adam masih hidup. Sebenarnya orang mengupah ia atu mahu si Adam mati.Nda membuang masa, si Ah Meng pun memanyap barang-barangnya untuk balik kampung.Inda ia memanyap semua kalau inda ketara tia kan. Selasai saja memanyap, si Ah Seng pun menuju ke keritanya di belakang woksyop tapi baru ia kan menyucukkan kunci ke keritanya, kedangaran ia bunyi tapak kaki orang dibelakang.Baru ia kan menoleh tarus kana tumbuk mukanya ani. Tarus tumbang ni si Ah Meng ani dan terais kesakitan pasal tumbukkan atu cun-cun arah batang hidungnya.Tarus ia menutup mukanya ani.Sampat ia meliat orang yang menumbuk ia ani rupanya si Adam.
Alum sampat si Ah Meng ani buat apa-apa, si Adam tarus menerajang parutnya dua-tiga kali.Makin lagi si Ah Meng ani terais kesakitan.
Mungkin kali pasal mendangar suara si Ah Meng terais atu, si Ah Seng sama tiga orang pekerjanya yang baru datang pun tarus belusir ke tempat si Adam mengerajakan si Ah Meng ani. Si Ah Seng pun tarus mengaga si Adam tapi baru si Ah Seng memigang bahu si Adam, si Adam tarus bepusing dan menerajang dada si Ah Seng. Tejungkang tarus si Ah Seng ani kebelakang. Meliat bos durang tejungkang atu, seorang pekerjanya atu pun tarus mengaga si Ah Seng dan dua orang lagi tarus menyerang si Adam. Si Adam ani bukan calang-calang orang.Dari damit sudah ia kana ajar silat oleh mulah nininya. Si Adam tarus mengelak dan menyerang balas. Dua-dua atu pun tekana jua pukulan dan buah-buah maut dari si Adam. Rabah dua-dua orang atu,tarus si Adam bepusing balik mengaga si Ah Meng yang kan bediri.Tarus si Adam tandang kakinya sampainya terabah. Si Adam tarus mengaga si Ah Meng yang ampai-ampai ani dn memigang bajunya. Si Adam tarus betanya,
"Siapa mengupah kau mensabotaj brek keritaku?" karas suara si Adam ani betanya.
Si Ah Meng diam ganya dan inda becakap tapi meludah ke muka si Adam. Si Adam tarus menumbuk muka si Ah Meng sampai 3 kali.Mungkin tekana sakit kali, si Ah Meng pun besuara,kedangaran kajar-kajar suaranya.
"hm..m..mm..itu si.."
Alum sampat si Ah Meng menghabiskan cakapnya, si Adam tarus rabah dan pengsan bila kerasaan ia kana ampas kuat arah kepalanya dari belakang. Pandai silat pebaik tu. Nada mata bah di belakang. Rupanya si Ah Seng yang menghampas pakai kayu baseball. Rupanya tadi lapas si Adam menandang ia atu,ia tarus bediri mengambil kayu baseball atu dalam worksyopnya. Sudah diliatnya si Adam tunduk memigang baju si Ah Meng, tarus ia bejalan arah si Adam dan menghampas kepala si Adam dari belakang.
*****
(Flashback-setengah jam lapas)
Selasai saja tadi si Adam dari woksyop si Ah Seng dan balik dari sana kan menuju motosikalnya, macam kana garu-garu hatinya untuk patah balik. Ngam ia kan sampai, teliat tia si Adam ani yang si Ah Seng ani becakap sama sese'orang'. Kali si Adam liat rupanya dangan si Ah Seng becakap atu rupanya si Ah Meng.Si Adam pun betapuk siring kerita. Teliat ia si Ah Meng mengunjuk duit rah si Ah Seng. Melihat hal atu, marah tarus si Adam meliat ni tapi ditunggunya sampai si Ah Meng ani ke belakang woksyop. Teliat saja si Adam kan si Ah Meng, tarus ia mengaga dan menumbuk muka si Ah Meng.
*****
(Back to back)
Sadar saja dari pengsannya, si Adam liat suasananya ani lain.Diliatnya kiri kanan ani plastik sampah.Rupanya ia ani di tempat pembuangan sampah.
"Kenapa ku disini ani?"
Si Adam cuba mengingat-ingati tapi kerasaan kepalanya ani sakit.Kali dirasanya bedarah kepalanya ani. Si Adam pun bediri.Sudah tah kepalanya sakit, bebau tia lagi.Manakan jua, pembuangan sampah mana yang inda bebau.
Si Adam pun bejalan pelahan-lahan.Alum batah ada kerita menghon ia.Kali ditolehnya rupanya adinya si Irfan. Kilala ia masih kan adinya atu tapi yang ia inda ingat kenapa ia ada di pembuangan sampah atu.
Si Irfan pun tekajut jua meliat abangnya si Adam bejalan kaki ani. Sudah beranti disiring,si Irfan pun betanya si Adam tapi si Adam inda ingat.Yang si Irfan tekajut lagi bila meliat baju si Adam habis bedarah.Si Irfan pun tarus membawa si Adam ke hospital.
*****
(Back to 2011-ptg)
Patang ani si Adam bercadang kan ke rumah si Eisya.Hajatnya kan minta maaf tapi yang di ingaukan si Adam ani, mungkin si Eisya nda mahu jumpa ia tapi walau apapun,si Adam kuatkan hatinya kan jumpa si Eisya ani.
Sebelum kesana,si Adam pun besiap-siap.Si Adam pun minta dangani arah adinya si Irfan. Sampai saja dirumah si Eisya, si Adam pun menakan bell.
Nda lama lapas atu, ada tia orang membuka pintu. Rupanya mama si Eisya. Kali mama si Eisya ani meliat si Adam tarus berubah mukanya macam orang banci meliat.
"Assalammualaikum Bu, ada si Eisya?" kata si Adam ani arah mama si Eisya dan menghulurkan tangan kan bejarah.
Mama si Eisya inda mau bejarah sama si Adam ani tapi kemudian becakap ia,
"Walaikumsalam.Bahapa kau kemari ani. Jangantah dikacau Si Eisya. Si Eisya kan kahwin bulan dapan. Agatah balik."
Mendangar cakap mama si Eisya macamaatu, si Adam macam faham. Memang mamanya atu inda suka ia dari dulu lagi pasal ia dari keluarga orang susah. Anak seorang 'driver' sedangkan durang orang kaya.Ani apatah lagi bakasnya keluar dari penjara,mikin tia betambah bancinya kan si Adam.Kemudian si Adam pun becakap,
"Kalau macamatu nda apalah Bu. Ku harap kita dapat bagi si Eisya surat ani.Kirim salam ja kedia Bu,ok Bu, assalammualaikum.."
Lapas saja mengambil surat dari tangan si Adam, tarus mama si Eisya ani menutup pintu. Si Adam pun bejalan semula ke kerita dimana adinya si Irfan ani menunggu.Sebelum ia kan masuk ke kerita sampat si Adam ani menoleh ke atas, sampat si Adam meliat ada orang menyubuk dari tabuk atas. Orang atu inda lain inda bukan, si Eisya..
Bersambung part 3..

Tiada ulasan:

Catat Ulasan