Khamis, 12 Januari 2012

Novel Cinta Brunei

Rahsia (Part 3)

(Surat dari si Adam untuk si Eisya)
-Pertama kali aku meminta maaf rah mu atas kehadiran surat ani dan atas kesalahanku rahmu sampai membuat kau bancikan aku.
Selama ani aku inda pernah beterus terang pasal apa yang terjadi. Aku banar-banar merayu arahmu supaya maafkan aku.Nda kenapa kalau kau bancikan aku tapi aku harap kau dapat membagi peluang arahku untuk menjelaskan hal yang sebenarnya rahmu.
Bukan ku kan minta simpati mu atau minta kasian, inda.. Tapi aku mahu kau tahu apa yang terjadi.Lapas atu, teserah rah mu untuk membuat keputusan samada kan tarus membanci aku atau memaafkan aku.
Ikhlas,
Adam.-
Selasai saja membaca surat atu, si Eisya pun duduk ke katilnya dan termenung jauh. Banarnya si Eisya lakat lagi menaruh kepercayaan arah si Adam. Si Eisya masih lagi sayangkan si Adam walau mamanya inda suka kan si Adam ani.Dulupun masa durang betunang, si Eisya ani tepaksa memujuk bapanya dan bapanya tah yang memujuk mamanya.Payah-payahan jua eh tapi awal aher, betunang jua durang.
Becakap pasal suka atau inda suka ani. Sudah jadi lumrah dalam hidup ani. Macamana pun ramainya orang sukakan kitani, selalunya mesti ada jua yang inda suka.Macamatu jua dalam apapun bidang yang kitani buat, pekara biasa tu kalau ada yang inda suka. Contoh saja dalam bidang penulisan ani, macamana pun ok nya cerita kitani tulis atu,memang ada yang inda suka jua.
Jadi kitani jangan ambil negatif kan hal ani. Kitani cuba nilai dari semua sudut.Kalau dari satu sudut semua hal atu menuju ke negatif, mungkin ada dari satu sudut yang lain,kitani boleh mengambil positif apa yang orang inda suka atu tapi semua keputusan kitani yang menentukan. Kitani yang berhak untuk memilih apa yang kitani mahu. Macamatu jua dengan kritikan atau taguran orang arah kitani.Jangan tarus marah. Fikir dulu dengan tenang. Semua atu sebanarnya boleh jadi pembakar semangat kitani. Makin padas kritikan orang arah kitani, makin kitani semangatkan lagi diri kitani. Kitani boleh buat. Boleh bah kalau kitani. Ehe.
Bebalik arah cerita ani, masa si Eisya tekanangkan kisah lamanya masanya mula-mula kenal si Adam 9 tahun lapas.
*****
(flashback-9 tahun lapas)
Si Eisya ani jadi rabutan ramai orang.Banyak yang kan bekenalan dan menghampiri atau sekaligus mengambil hati si Eisya. Siapapun laki-laki yang teliat muka si Eisya ani gerenti terpesona. Sudahtah muka lawa, anak orang kaya tia lagi, jadi 'full package' lah si Eisya ani tedapat. Kira 'famous' lah si Eisya ani jadi pujaan hati ramai laki-laki sampai si Eisya pernah becakap, petik satu jari, 10 yg datang, kalau 10jari? 10 orang jua tu..campur lagi 10jari kaki, banyak tu jadinya,ehehe.
Sudah macamatu,sombong tia si Eisya ani. Baginya ia boleh dapat mana-mana laki-laki yang ia mahu.Jadi suka-suka hatinya lah ia kan mempermainkan hati dan perasaan laki-laki lain. Dibaginya harapan tapi ia jua yang menghancurkan. Jadi sungguhpun ia jadi rabutan ramai laki-laki tapi alum ia tejumpa laki-laki yang dapat banar-banar menawan hatinya.
Si Eisya kenal si Adam pun masa durang sama-sama ikut program perkhemahan Belia.Semua laki-laki yang ikut atu iski banar kan bekenalan sama-sama si Eisya kecuali si Adam. Memang si Adam pun ada minat kan si Eisya tapi dipendamnya saja dalam hati. Ada jua kawan si Adam sama-samanya sebilik masa program atu betanya si Adam pasal si Eisya,
"Dam inda kau cuba men'try' mengurat si Eisya ah? Aku udah mencuba tapi nada harapan usulnya..haha." kata si Asyraf ani rah si Adam.
Si Adam senyum saja dan kemudian baru ia becakap,
"Aku sadar siapa aku geng.. jangan katakan memandang aku dengan dua tampik mata, setampik mata pun kali inda ia mau meliat aku.. Sudah tah aku ani nda hensem, orang susah tia lagi, dui ma, macam langit sama bumi.Jauh api dari panggang..ehe."
"Jangan merandah diri ani geng. Alum cuba alum tau.. cuba saja geng..manatau terpikat ia kan kau, ramai yang sasak eh.. haha aku pun sasak tu, ehe.."
"Liatlah nanti.. k ehe."
Selesai saja becerita-cerita atu durang pun besiap-siap kan turun ke bawah memasang khemah untuk karang malam sesi suai kenal.
Malamnya, semua peserta pun bekumpul di tangah-tangah unggun api.Keramaian peserta termasuk pengawas program atu seramai 66 orang. 30 peserta bini-bini termasuk pengawas bini-bini dan 30 peserta laki-laki termasuk 3 pengawas laki-laki.
Selapas saja selasai bacaan doa selamat, sesi suai kenal pun kana adakan. Seorang-seorang pun mengenalkan diri masing-masing. Kumpulan bini-bini yang mulakan dulu.Seorang-seorang mengenalkan diri, keraja dimana, anak siapa dan jua membagitau hobi masing-masing.Sampai giliran si Eisya, ramai yang tapuk tangan dan bepiul-piul. Bini-bini idaman jua banar. haha.
"Nama me si Eisya, umur me 18 tahun.Me kaja rah ofis bapa me.Bapa me ada bisnes sendiri.Lastly, hobi me membaca. Salam perkenalan.."
Lapas saja si Eisya becakap atu, kedangaran ada suara laki-laki becakap,
"Beboifren sudah kah balum?"
Suasana menjadi riuh randah. Si Eisya sekadar senyum.Sudah tanang sikit, baru tah ia becakap,
"Alum ada calon yang berkenan di hati.. "
Suasana jadi riuh balik.Dalam riuh-riuh atu si Eisya sampat meliat ada seorang laki-laki yang duduk di hujung sekali diam ganya dan merenung si Eisya dan tesenyum rahnya. Meliat pandangan laki-laki atu, macam ada sesuatu perasaan mengusik ke dalam hatinya. Siapa laki-laki atu?
Pertanyaan si Eisya atu ahernya terjawap bila giliran laki-laki atu mengenalkan diri.
"Namaku si Adam. Umurku 19 tahun dan hobiku menulis..Aku bukan siapa-siapa.."
Sudah semua selasai, durang semua pun menikmati jamuan. Sebenarnya si Eisya ani kan mengaga si Adam tapi tekana memikirkan ego nya pasal ia lawa dan jadi rabutan orang atu, inda tia mahu .Lagipun dalam fikirannya, gerenti sanang-sanang saja ia dapat si Adam atu. Ia kan menunggu si Adam mengaga ia tapi si Eisya silap.Si Adam langsung inda mengaga ia macam laki-laki lain. Sampai masa kelurusan durang sama-sama mengaut makanan pun, si Adam buat-buat serias saja. Mun laki-laki lain, gerenti udah ia kana kautkan tu.
Melihat sikap si Adam macamatu, si Eisya macam tecabar. Tercabar ego nya pasal si Adam macam langsung inda memandang kedia. Jadi si Eisya berazam untuk mendapatkan si Adam sampai sanggup ia minta numbur hp si Adam arah si Asyraf.Tekajut pulang si Asyraf minta numbur telipun si Adam atu.Fikirnya tah si Eisya ani kan minta no hp nya.
Sepanjang tiga hari program atu diadakan, fikiran dan perasaan si Eisya tertumpu arah si Adam tapi macam biasa, si Adam nada menunjukkan atau meluahkan kata-kata kalau ia minat kan si Eisya. Laki-laki lain atu inda membuang peluang langsung. Asal saja ada kesempatan becakap atau bejumpa si Eisya, mesti durang kan menackle si Eisya.Si Adam saja yang inda.Pernah lagi durang dua duduk semeja tapi si Adam masih rilek saja.Sepatah si Eisya betanya, sepatah jua dijawapnya.Mun yang lain, sepatah si Eisya becakap, 100 patah durang menjawap.
Sudah hari perpisahan, macam-macam lah durang adakan.Ada yang kana suruh menyanyi solo,ada jua bekumpulan tapi si Adam kan suruh menyampaikan sebuah puisi sambil begitar.Mau inda mau, diteruskan th jua.Baik jua si Adam ani kreatif..ehe.
~Engkau seperti bidadari..
Penuh dengan sejuta pesona pemberian Illahi..
Aku cuma mampu memandang ke dalam sanubari..
Mencermin diri..
Adakah layak untuk lelaki ini..
Bergandingan dalam sekeping hati...
Aku cuma mampu bermimpi..
Bermimpi di siang hari...~
Si Eisya terasa yang si Adam menujukan puisi atu untuk ia. Mendangar maksud puisi atu makin kuat lagi hati si Eisya kan mengenali si Adam ani.
Selasai saja program atu diadakan, semua lah termasuk si Adam balik ke rumah masing-masing.
Baru saja si Adam sampai dirumah, ia menerima msg.
-As'salam Dam.. Ani si Eisya. Boleh me jumpa u isuk?-
Si Adam pun tekajut.Satu pasal si Eisya tahu numbur hp nya dan dua pasal si Eisya kan membawa ia bejumpa tapi kemudian di balasnya,
-Walaikumsalam Sya, bejumpa? Bejumpa pasal apa tu?-
-Yup, me kan jumpa u pasal me kan kenal u lagi. Honestly me tetarik arah u. So bila u ada masa lapang? Me lanja u makan.-
Makin tia lagi si Adam ani tekajut. Macam inda ia pecaya membaca msg dari si Eisya atu. Dua tiga kali dibacanya tapi masih lagi sama.Ndakan betukarkan perkataannya atu. Ehe. Sampainya becakap arah dirinya sendiri si Adam ani,
"Si Eisya tetarik arah ku?Aik macamana buleh? Jangan-jangan ada udang sebalik megi kali si Eisya ani.."
Si Adam befikir sekajap dan kemudian becakap lagi ia,
"Bah jumpai saja tia dulu. Manasaja tia kedia walaupun ada niatnya lain kah apa kah.."
Batah-batahnya befikir atu, bebunyi lagh hp nya pasal ada msg masuk.
-Cana Dam, sudikah u inda ni jumpa me ani?-
Si Adam pun tarus membalas,
-sori-sori lambat membalas tadi. Bah manasaja. Gitau saja dimana kau kan bawa bejumpa. K.-
-K. Jumpa kitani isuk di restoran Kfc di Bandar kul 8 malam.k.-
*****
(Bebalik arah cerita si Adam mengerajakan si Ah Meng)
Meliat saja si durang si Ah Seng yang si Adam ani pengsan ampai-ampai dengan kepalanya bedarah, si Ah Seng jadi panik. Dalam fikirannya mungkin si Adam ani mati.
Salah seorang dari tiga orang pekerja si Ah Seng pun membagi cadangan arah si Ah Seng lapasnya merasai nadi arah pergelangan tangan si Adam.
"Nggak usah panik bos..Orang ini masih lagi hidup..saya yakin bos."
"Macamana kau tahu Suro?Kalau nya mati, apa kan kitani buat?"nya Si Ah Seng betanya arah pekerjanya dari Indonesia, si Suro.
"Nggak usah hawatir Bos.. Semua bisa diatur.. Beres!"lapas saja becakap, tarus si Suro sama yang dua orang atu mengangkat si Adam ke dalam kerita si Suro.
Mendangar saja si Suro becakap macamatu barutah si Ah Seng sanang hati.Si Ah Seng tarus mendirikan si Ah Meng. Habis bangkak-membangkak muka si Ah Meng ani bakas si Adam tumbuk ah. Si Ah Seng pun tarus menyuruh si Ah Meng masuk kerita dan jalan dari sana.
Dalam 15minit, ada tia durang si Suro ani balik. Si Ah Seng pun tarus betanya,
"Macamana Suro, sudah kamu uruskan?"
"Beres bos. Sudah saya buang di tempat pembuangan sampah tanpa dilihat oleh siapapun..hahaha biar dia mampus aja disitu, makanya kita nggak akan ada masalah kalau orang itu kehilangan nyawa disitu.."
"Bagus,bagus..bahawu ia begeliga otak mu ni Suro. Hahaha."
"Pekara biasa itu bos.. Kalau nggak pintar,mana bisa cari makan."
Lapas atu durang pun ketawa.
*****
(Back to 2011)
"Mendangar kau udah yang si Adam kana bebaskan kemarin?" kata si Din arah si Farouk.
Mendangar saja nama si Adam kana sabutkan, tarus si Farouk bediri. Nampak reaksinya marah.
"Banar wah Din, bah kitani intai ia Din. Nda ku puas hati ni. Bedandam ku masih kan ia atu.Ia yang membunuh abangku si Kamel. Jadi hutang nyawa dibayar nyawa jua. Kalau secara kasar inda dapat, kitani buat cara halus!!"
Bersambung part 4...

Tiada ulasan:

Catat Ulasan